ගැබිණි සමයේ ඇතිවන ඉන්සොම්නියා තත්ත්වයට පිළියම් 

දරුවෙක් ලැබෙන්න ඉන්නකොට ඇති වෙන අපහසුකාරී තත්ත්වයන් නිසා හරි හැටි නින්දක් නොලැබීම කියන්නේ ගොඩක් අම්මලාට තියන ගැටලුවක්. ගොඩක් අම්මලා ඒ ගැන පැමිණිලි කරන්නේ “මොනා කළත් මට නින්ද යන්නේ නෑනේ ” කියලයි. ඒත් ඇත්තටම ඔබට විතරක් තියන ගැටලුවක් නෙමෙයි ඒක. මේ තත්ත්වය හැඳින්වෙන්නේ Insomnia විදිහටයි. ඉන්සොම්නියා තත්ත්වයේදී නින්දට වැටීම හෝ එක දිගට නිදා ගැනීම දුෂ්කර වෙනවා. 

ගර්භණී සමයේදී ඇති වෙන තෙහෙට්ටුව සහ නින්ද සම්බන්ධ ගැටළු වලට ඔබේ ශරීරයේ හෝමෝන වල වෙනස්කම් විශාල හේතුවක් වෙනවා. මෙම වෙනස්වීම් මාංශ පේශි වලට බාධාකාරී බලපෑමක් ඇති කරන්නත් පුළුවන්. ඒ නිසා නින්දෙන් ගෙරවීම ද ඇති වෙනවා. ඒ නිසා බරින් වැඩි කාන්තාවන් තුළ sleep apnea ඇතිවීමේ අවදානම ද වැඩි වෙන්න පුළුවන්. ඊට අමතරව ඔබගේ නව හෝමෝන මට්ටමේ වෙනස් වීම් නිසා රාත්‍රියේදී නිතර නිතර මුත්‍රා කිරීමේ අවශ්‍යතාවය ඇතිවෙන්න පුළුවන්. මෙම බාධා කිරීම් මෙන්ම ඔක්කාරය, ආමාශයේ දැවිල්ල සහ ගර්භණීභාවය ආශ්‍රිත වෙනත් වේදනාවන් නිසා ඇති වන අපහසුතාවන් එක්ක ඔබට නින්ද අහිමි වෙනවා. මානසික කැළඹීම් සහ ආතතිය ද ඉන්සොම්නියා ඇති වීමට හේතුවක්.

 

ගර්භණී සමයේදී ඇතිවන හෝ නරක අතට හැරෙන නින්ද සම්බන්ධ පොදු ගැටළු සමහරක් නම් :

 

  • නින්ද නොයාම
  • කකුල් සෙලවීමේ දැඩි අවශ්‍යතාව Restless leg syndrome (RLS)
  • Sleep apnea
  • රාත්‍රී කාලයේ ගැස්ට්‍රයිටිස් නිසා ඇති වන අපහසුතා / ආමාශයේ දැවිල්ල

 

ගර්භණී සමයේදී ඔබට නින්ද නොයාම වළක්වා ගන්න පුළුවන් කොහොමද ?

  • සැලසුමක් හදන්න සහ ඒ හරහා නිදා ගන්න වෙලාවට ප්‍රමුඛතාවය දෙන්න.
  • ඔබේ වෛද්‍යවරයාගේ උපදෙස් ඇතුව දිනකට මිනිත්තු 30 ක් පමණ ව්‍යායාම කිරීමට උත්සාහ කරන්න.
  • ඔබේ කළලයට හා වකුගඩුවලට රුධිර ප්‍රවාහය සහ පෝෂ්‍ය පදාර්ථ ලැබීම වැඩි දියුණු කිරීම සඳහා ඔබේ වම් පැත්තට නිදාගන්න සහ දීර්ඝ වෙලාවක් තිස්සේ උඩුබැලි අතට නිදාගැනීමෙන් වළකින්න.
  • ඔබට සුව පහසු ඉරියව්වකින් ඉන්න නම් ස්ලම්බර් කොට්ටයක් ( Slumbar Pillow) භාවිතා කරන්න. එයින් ඔබට සුවපහසුවක් ලබා දෙන අතර කොඳු ඇට පෙළට ලැබෙන්න ඕනේ නිසි සෞඛ්‍ය ප්‍රතිලාභ වැඩි කරවනවා. 
  • දිවා කාලයේදී දියර වර්ග බොන්න. විශේෂයෙන් ජලය පානය කරන්න. ඔබේ රාත්‍රී නින්දට පැය 2 කට කලින් ඔබ පානය කරන දියර ප්‍රමාණය අඩු කරන්න.
  • කුළුබඩු සහිත, ආම්ලික හෝ බැදපු ආහාර ගැනීම නවත්වන්න. ඒ වෙනුවට දවස පුරා නිතර නිතර ගුණදායී කුඩා ආහාර වේල් අරගන්න.

 

පරීක්ෂා කරන්න

ගර්භණී සමයේදී නින්දෙන් ගෙරවීම කියන්නේ බහුලව සිදු වෙන දෙයක්. නමුත් ඔබට හුස්ම ගැනීමේදී විරාමයක් ඇති වෙනවා නම් නින්දෙන් ගෙරවීම ගැන පරීක්ෂා කරන්න. එසේම ඔබේ රුධිර පීඩනය සහ මුත්‍රා ප්‍රෝටීන් පරීක්ෂා කරලා බලන්න. විශේෂයෙන් ඔබට ඉදිමුණු වළලුකරක් හෝ හිසරදයක් තිබෙනවා නම් පරීක්ෂා කරලා බලන්න.

  • ඔබට Restless Leg සින්ඩ්‍රෝමය තිබෙනවා නම් ඒකට හේතුව ඔබේ ශරීරයේ පවතින යකඩ හෝ ෆෝලේට් ඌණතාවය වෙන්න පුළුවන්.
  • ඔබට අවශ්‍ය වෙලාවට නින්ද යන්නේ නැත්නම් ඒ සඳහා ඔබටම බල කරන්න එපා. පොතක් කියවීමට, විවේකයක් ගැනීමට හෝ භාවනාවක් කිරීමට උත්සාහ කරන්න.
  • නාන කාමරයේ අධික එළියක් දෙන විදුලි පහන් දල්වනවා වෙනුවට නයිට් ලයිට් එකක් භාවිතා කරන්න. ඒක ඔබට ඉක්මණින් නින්දට යාමට උපකාරී වෙයි.
  • ඔබේ මොළයේ ස්නායු සන්සුන් කිරීමට භාවනාවක් කරන්න. අන්තර්ජාලයේ ඒ සඳහා හොඳ දැනුවත් කිරීම් සහ මාර්ගෝපදේශන වැඩසටහන් තිබෙනවා.

 

නින්ද පිළිබඳ ගැටළු පිළිබඳව ඔබේ වෛද්‍යවරයා සමඟ කතා කරන්න බිය වෙන්න එපා. මොකද නින්ද නොයෑම කියන්නේ වෛද්‍යවරයාට පරීක්ෂා කිරීමට අවශ්‍ය වෙන ඔබේ පෝෂණ ඌනතාවයක හෝ ශ්වසන ආබාධයක (නින්දෙන් ගෙරවීම) අනතුරු ඇඟවීමක් වෙන්න පුළුවන්. ඒ සඳහා ඔබට ප්‍රයෝජනවත් වෙන යෝජනා රැසක් වෛද්‍යවරයා ළඟ තිබෙන්න පුළුවන් !